BMW N20 2.0 benzinë: zinxhiri i kohës dhe udhëzuesit plastikë
N20 është motori 2.0 turbo benzinë që BMW e montoi rreth viteve 2011–2017 te Seria 1, 3, 4, 5, X1, X3 dhe Z4. Problemi më i shpeshtë i tij nuk është vetë zinxhiri, por udhëzuesit plastikë që plasin dhe e lënë zinxhirin të lirë.
· Auto Energjia, Prishtinë
Foto: Hoyoun Lee / Unsplash
Si fillon problemi
Udhëzuesi plastik i zinxhirit me kohë forcohet nga nxehtësia dhe fillon të plasaritet. Copat mund të bien në karter dhe të zënë rrjetën e pompës së vajit. Kur zinxhiri humb tensionin, dëgjohet një zhurmë si rrapëllimë ose fishkëllimë, sidomos në ndezje të ftohtë dhe në rrotullime të ulëta.
- zhurmë rrapëllime në sekondat e para pas ndezjes
- fishkëllimë që rritet me rrotullimet e motorit
- dritë e motorit me gabim të korrelacionit të boshteve
- copa plastike në filtrin e vajit gjatë servisit
Si e kontrollojmë
Gjatë ndërrimit të vajit kontrollojmë filtrin për copa plastike, dëgjojmë motorin me stetoskop dhe lexojmë vlerat e adaptimit të VANOS. Kur ka dyshim, hiqet kapaku i valvulave dhe shihet gjendja e udhëzuesit të sipërm. Ndërrohet komplet: zinxhiri, udhëzuesit, tensioneri dhe bulonat e rinj sipas standardit të fabrikës.
Pse nuk duhet pritur
Te N20 zinxhiri mund të kërcejë dhëmb dhe valvulat takohen me pistonat. Atëherë riparimi bëhet kokë motori ose motor tjetër. Ndërrimi preventiv kushton shumë më pak se dëmi pas këputjes.
Pyetje të shpeshta
Në cilat vite është më i shpeshtë problemi te N20?
Më shpesh te motorët e prodhuar deri rreth vitit 2015. Versionet e mëvonshme kanë pjesë të përmirësuara, por kontrolli i zhurmës vlen për të gjitha.
A e zgjidh problemin vaji më i trashë?
Jo. Vaji i duhur me interval të shkurtër e ngadalëson konsumin, por udhëzuesi i plasur duhet ndërruar.
Servis BMW te Auto Energjia
Në Prishtinë bëjmë diagnostikim dhe servis për BMW: motor, ndërrues automatik, elektronikë, frena, suspension dhe klimë. Para çdo riparimi ju shpjegojmë çka është matur dhe pse rekomandohet puna.